【舊文重溫】
之前自己打落好多愛情文，想整理一下畀大家重溫
Facebook會精選一啲share畀大家，
另外大部分文章我會慢慢轉貼到Patreon，
免費開放畀大家睇：https://www.patreon.com/hkgirlfriend
（鍾意嘅咪subscribe支持下！）
幾年前寫㗎啦，文筆同思想都可能有啲幼稚
包容下。
//
《愛情扣分制》
愛情如果係一個計分制度，咁拍拖之前就係加分制，拍拖之後就會變成扣分制。
愛上對方或者曖昧嘅時候，對方就好似一個等待被打開嘅寶藏，你嘅期待會令你好容易就覺得對方好。對方只要做好少嘅事，或者係講啱一句說話，問候你多兩句，氹下你開心，買下小禮物⋯⋯你可能已經雙眼發光，覺得好幸福，覺得呢個人好好，好想得到佢。拍拖之前我哋總係會用欣賞同包容嘅眼光去睇對方，總係好似每日都發掘到一個新世界咁驚喜。
到一齊咗之後，熱戀期過去，呢個寶藏早已經被開發，當初你最欣賞佢嘅優點都已經習以為常，慢慢地所有嘢變得理所當然。「佢係我男朋友，佢氹我好應該啦，溫柔體貼係基本喎。」於是你就變成一個欲求不滿嘅婦人，開始渴望對方可以喺已知優點上再開出新嘅優點。同時，你開始唔再用欣賞包容嘅目光去睇對方，慢慢就學識挑剔，開始覺得對方嘅缺點好礙眼，開始喺呢隻小雞蛋上挑骨頭。
有啲人拍拖之後，會覺得點解對方好似同自己想像有出入，或者點解對方好似變咗⋯⋯其實好多時都係因為當初拍拖之前，我哋太過專注喺對方好嘅一面，樂此不疲喺度開發對方嘅優點。到後來開發完對方好嘅一面，就不得不去開發埋對方差嘅一面，然後見到對方缺點浮哂上水，就覺得晴天霹靂。
令你失望嘅唔係對方，而係你當日將對方想像得太好，捧得太高，太離地，所以「想像汽球」被刺破時，先會墜地跌得咁痛。
IG：@hkgirlfriend
FB：港女友
Search